Deux associations seynoises retracent l’histoire de l’action sanitaire et sociale locale. Elle fut très en avance après guerre, avant d’être sabrée par les politiques libérales initiées dans les années 1980.
“Una causa deu èstre ben clara, es que lei chausidas politicas se traduson per d’accions socialas. De veire tot ce que se debanèt au nòstre a l’après-guerra, e coma se barrèt puei en 2005 lo Centre Medicosociau, crema au lume !”
Henri Pascal, cercaire en sciéncias socialas, n’es segur. A publicat un “La Seyne-sur-Mer : action sociale et service social de la municipalité 1947-84”, amé Cristina de Robertis, que bailejava, ela, la formacion en trabalh sociau de la Crotz Roge de Var, Francesa Ravoux, una Seinenca de tota la vida es consultanta en accion sociala, e Francesa Vivière trabalhèt a La Sanha au Centre Medicosociau puei au Servici dau Patrimòni.
Fau va dire, amb aquela còla, La Sanha èra ben en avança dins Var per sa politica d’acompanhament sociau, tot aqueleis annadas. Per pròva, de remarcar lo premier asile de pichons de Var que se duerbèt a La Sanha per Nadau de 1959, carriera Emili Combes, onte recaptava cinquanta nistons.
Mai segur un còp evacuat lo fracham d’après lei bombardaments de 1944, la prioritat dei municipalitats comunistas siguèt d’ajudar lei mens astrucs socialaments, dins de domènis coma la santat, l’enfança, lo vielhum e la cultura, tot d’un còp.
“Per lo monde seinenc d’aqueu temps, la reconstruccion èra tant sociala coma fisica” sotalinha ben Françoise Ravoux. Fau segur per aquò se rementar de l’ajoncha Joseta Vincent, que portava fòrça estructuras dau temps de la municipalitat Merle.
Am’ aquò tre 1948 se duèrbe un “obrador municipau” onte lei pus umils podián trobar de cauçaduras, de lanatges e de vestits de dessota. Mai dau temps, l’esfòrç se menava tanben d’organizar de fèstas, coma per exemple un aubre de Nadau dei paures, e de vins d’onor a tota mena d’ocasions…
Arribaràn lei premiers HLM, lo Planning Familiau, e la Proteccion Mairala e Infantila, e lo Centre Medicosociau puei “que faguèt l’orguelh de tota la ciutat, tant èra originau dins Var” ajusta Francesa Vivière ; deviá “metre a disposicion de totei, lei mejans mens carivents per se sonhar e aparar la santat”. Particularament, amb lo terçpagant, lo monde que i va farà pas l’avança dei pagaments, çò qu’èra enòrme per mai que d’un.
La bèla creissença de l’accion medicosociala se tancarà amb lo cambiament de municipalitat en 1984. L’alternança drecha-gaucha farà tot aqueu trabalh sociau precari, e en 2005 barrarà sei pòrtas lo Centre Medicosociau, dau temps dau cònsol Carle Scagglia. Era tant important, coma la colona vertebrala de tot aqueu trabalh per la santat.
“Amé la decentralisacion, lo Despartement segur aguèt la man sus plen de causas, e au nòstre èra de drecha, dau sociau n’aviá pas un biais de veire parier” resumís Henri Pascal.
L’obratge de 48 paginas siguèt realizat amb lo travalh dau Groupe de Recherche en Histoire du Service Social e aqueu de l’associacion Histoire et Patrimoine Seynois. action sociale BAT
Article rédigé en graphie classique, avec les conseils de Pèire Brechet
Les mots d’Aquí
barrar = fermer
asile de pichons = crèche
bailejar = gouverner
fracham = gravats
rementar = rappeler
ajustar = ajouter
biais = manière
crema au lume : expr. « C’est évident ».
